حشمهت خوسرهوی: خهم ئازادی و پاراستن هۆرمهت کهلهمه کارێک کهێد ک ئایهم ئهرا نجات دان یهی کهلهمه، گیان شیرین خوهێ پێشکهش وه رێ ئازادی بکهێد.
واز کردن دهروهچ ئازادی وه روی قهڵهمهێل شکیای و دهنگهیل کپهو کریای، کار حهزرهت فیله.
ئاخر له جامگهی ئیمه کهلهمه بوود وه بایس شکانن قهڵهم و دویرهو کهفتن له ویرگهی ئازادی.
هاوردنه سهر زوان تاقه کهلهمێگ توێنید بوود وه هۆێک ئهرا شکانن حهیسیهت و ئابروی ئنسان.
ئهرای دیکاتورهکان قهڵهم گهپترین ترسه و نوویسان له ناو دڵ جامگهی داخریاگ، تاوان نهبخشیایه.
دیکتاتورهێل ئیمرۆژیی ئهرایان تهوفیر نیهکهێد ک ئههل قهڵهم تواێد چه بنویسید.
دهر هاوردن قهڵهم له گیرفان و خشاننی وه سهر کاغهزدا، زدایهتیه گهرد خوا.
ههر کهسێگ له فهرموودهگهیل خوایهیل دهستکرد سهرپێچی بکهێد ئهوا کوڵه سوویک زندان دهسی ماچ کهێد.
سێ مانگ وهرجه ئیسه کورێکی باڵابهرز و لاغر له ناو کویچه بێ نازکهفتیهکان کرماشان خهو وه داهاتگ ترویسهکه دار دی و له تیهریکی شهوا تواست چراخیک ئهرا مانهوه و وهردهوامی رۆشن بکهێد، وهلێ ئیسه خوهیچی له کوڵه سوویک زندان تیهنی دیین داڵگیه.
کاوه خوهی دا له قهرهی ترسناکترین کار له رۆژگار ئیمرۆژماندا و تواست لهیوا سروود ئازادی ئهرای مناڵهێل هویهت گوم بی کرماشان و ئیلام وه قیمهت زندانی کردن قهڵهمهگهی بخوهنێد...
کاوه یادگار ئحسان و کهیانوش وه ئهسپایی هێزگرت، وهلێ فره وه پی نهچی که بی وه ههڵگر زار دڵ گشت مناڵهێل مهڵوهند جینوساید کریای و ژنهێل ههمیشه خهمبار و چهو له رێ.
کاوه رێکخریاگ ماف ئنسان کوردستان ههڵوژاند تا بهشکهم بتوێنید خهمهێل کرماشان و ئیلام گهرد ماکوو و مههابات بهش بکهێد. تا بهشکهم وه قهڵهمهگهی بتوێنید مهرزهێل دروسکریای بهین کرماشان ههلۆرك ژیار و شارستانیهت گهرد مههابات و سنه و ئورومیه ههڵبگرێت.
کهیانوش وه بێ کهس و له وهرچهو تهمام دونیا گیانی وهلێ سنیا. له ناو مهوج چهن ملیونی مهردم تهێران تهقه له دهنگ تهمویره کریا. تهمویره شکیا، پهنجهگهێل رهنگین کوڕه قامهت بهرز و خوهش گوفتارهگهی ئێل سنجاوی شهڵاڵ خوین بی.
خهوهر شکیان پهنجهگهێل تهموویره ژهن بی وه قسهی سهر زوان تهمویره ژهنهێل دیار یارسان له کرماشان.
یهکمین نهفهر خهوهر مهرگ کیانوش دا وه دونیا کاوه بی.
تهمویرهیل ژهنهیل یا حهق، له وهردهم ماڵ کیانوش جهمهوبین و وه ژهنین تهموویره کیانوش وهرهو قهورسان شار بهدرهقه کردن.
دۆمای کیانوش نهخشهی کوشتن ئحسان وهرێوه چی. ئحسان بی وه قارهمانترین ناو ئهرای رومانویسهیل کرماشانی. شاعیرهیل میلکان کرماشان وه شعرهێل خوهیان گوڵواران قهورسان کردن.
خهم له دهسدان ئحسان زامهێل کوینهی کاوه نووه و کردن.
ئحسان له وهر نهویین ئازادی سیاسی بی وه تازهترین شههید کرماشان. ئهوان تواستن وه کوشتن ئحسانهکان نوا له ههڵاتن خوهر له مهڵوهنده هویهت گوم بی بگرن.
تواستن بوویشن: باس ئازادی و هوییهت له کرماشان قهیهخهس و ئی شاره هی ئیوه نیه.
ئیمه زووی تا ئیسه ئی شاره وهلیدان دزیمنهس.
بهڵێ کوشتن کهیانوش و ئحسان پهیامێگ بی ئهرا دهس له سهر دهس دانان و سهر خو ههڵگرتن وهرهو بیاوانێگی چۆڵ و هۆڵ.
وهلێ کاوه وه نویسان رازهێل نهوتریاگ ناو دڵ داڵگ کیانوش و "بلاچاو" ئهرا ئحسان وه سهر خهت قرمزیدا رهد بی و وهتیا: چه توان با بکهن، چه توان با بووهن، من تازه بیمهس وه بلاچاو...
